Zëdhënësi i ushtrisë izraelite Daniel Hagari, thotë se në spitalin kryesor të Gazës “Al-Shifa” mbaheshin disa nga pengjet që Hamasi mori në ndërhyrjen e 7 tetorit në jug të Izraelit. Filmimet janë bërë nga kamerat e sigurisë së spitalit ditën e sulmit dhe kanë fiksuar momentet kur disa nga pengjet sillen të plagosur në spital.
Përmes këtyre pamjeve, Izraeli mbështet pretendimet se Hamasi ka shfrytëzuar infrastrukturën civile për të fshehur aktivitetet e militantëve të tij. Tel Avivi pretendon se Hamasi e ka shfrytëzuar spitalin në shkelje të rregullave ndërkombëtare, si qendër komandimi.
Hamasi pranon se ka ngritur një rrjet të gjerë tunelesh nëntokësorë në gjithë Rripin e Gazës, por ka mohuar që ky sistem shtrihet nën spitalin Al-Shifa. Po ashtu ka refuzuar të pranojë se ka strehuar pengje në spital.