Qëministrat e rinj të propozuar më 28 dhjetor në Asamblenë Kombëtare të Partisë Socialiste nga kryeministri Edi Rama të nisin punë, do t’u duhet të presin deri më 21 janar. Në këtë datë rinis punën parlamenti e ata do të votohen dhe do të marrin zyrtarisht detyrën.
Kështu, shtatë ministrat e shkarkuar dhe zëvendëskryeministrja do të vijonë të jenë në detyrë deri në rifillimin e sesionit të ri parlamentar. Përpara votimit në parlament, kryeminsitri Rama duhet të çojë të gjitha propozimet për ndryshime tek Presidenti Ilir Meta për të marrë dekretin e tij.
Presidenti ka 7 ditë afat që pas ditës që merr zyrtarisht propozimet për të dekretuar ose jo ministrat e rinj. Shtatë ditëshi edhe mund të shtyhet nëse shohim precedentin e Minsitrit të Brendshëm, Sandër Lleshi, ku Kryeministrit iu desh ta propozonte dy herë sepse vetëm pasi mori të gjitha informacionet e nevojshme për të, Meta e dekretoi pasi dogji një herë afatin kushtetues 7 ditor.
Që nga dita kur njoftoi zëvendësimin e minsitrave, kreu i qeverisë ende nuk i ka çuar emrat në presidencë për dekretim por kjo do të ndodhë në ditët e ardhshme.