Autorët e grabitjes së djeshme të një filiali banke në Koplik arritën të merrnin nga sportelet e saj plot 1000 euro, 1000 dollarë dhe rreth 400.000 lekë (të reja).
Ata ishin tre persona dhe hynë në ambientet e bankës të armatosur dhe të maskuar për të grabitur paratë që ndodheshin në bankë. Autorët hynë në filialin e bankës rreth orës 14:10 minuta të ditës së djeshme. Në ambientet e bankës veç punonjësve ka pasur dhe klientë, që janë terrorizuar. Nën kërcënimin e armëve morën paratë dhe u larguan me një mjet “Volkswagen” ngjyrë të errët.
Pak minuta më pas në dalje të qytetit, rrugës për në Bajzës i vunë zjarrin makinës në mes të rrugës. Më pas ndaluan një Benz në të cilin ndodheshin tre persona. I kërcënuan me armë dhe i zbritën nga mjeti. Grabitësit morën Benzin dhe mësohet se u larguan në drejtim të Hanit të Hotit.
Efektivët e policisë dhe efektivë të FNSH-së së Shkodrës janë vënë në ndjekje të tyre dhe ende nuk i kanë kapur.
Gjithashtu me ndihmën e një helikopteri u bënë edhe kontrolle nga ajri.