Ministri i Mjedisit, Sofjan Jaupaj, u shpreh sot se Shqipëria ka siguruar një projekt prej 40 milionë dollarësh për ndryshimet klimatike, në kuadër të programit “Albadap”, që konsiderohet si projekti më i madh i klimës që po zbatohet në Ballkanin Perëndimor.
Gjatë një konference për shtyp me gazetarët, Jaupaj tha se asnjë vend tjetër i Bashkimit Evropian apo i Ballkanit Perëndimor nuk ka aktualisht një projekt të tillë të financuar nga Fondi Global i Mjedisit.
Duke u ndalur te konferenca treditore e klimës që solli në Shqipëri përfaqësues të institucioneve evropiane dhe organizatave botërore të mjedisit, Jaupaj nënvizoi se “rezultatet e kësaj konference ishin krejt pozitive për vendin tonë. Kjo platformë do të vazhdojë të zhvillohet çdo vit në Shqipëri, duke e çuar vendin tonë në një pozicion lider sa i takon ndryshimeve klimatike në Ballkanin Perëndimor”.
“Shqipëria ka marrë gjithashtu garancinë për financimin e një projekti tjetër në sektorin e pyjeve, me vlerë 50 milionë dollarë, me mbështetjen e Maqedonisë së Veriut. Financimi do të jetë grant dhe pritet të miratohet nga Fondi i Gjelbër Global i Klimës”, tha ai.
Sipas Jaupajt, fondet do të përdoren për zgjerimin e fidanishteve, ripyllëzimin e zonave të dëmtuara nga zjarret dhe erozioni, si edhe për rritjen e kapaciteteve në administrimin e pyjeve.
Ministri njoftoi se ministria që ai drejton ka miratuar krijimin e katër agjencive rajonale të pyjeve, me synimin për të rritur praninë në territor dhe për të ndihmuar bashkitë në planet e menaxhimit pyjor. Ai theksoi se do të krijohet ndërmarrja shtetërore e pyjeve, model që, sipas tij, aplikohet në disa vende të Evropës.
Sipas Jaupajt, në tetor të vitit 2025, ministria e Mjedisit në bashkëpunim me Kadastrën Shqiptare përfundoi regjistrimin e të gjithë fondit pyjor të Shqipërisë, i cili përbëhet nga rreth 1.2 milionë hektarë pyje. Sipas tij, kjo përfaqëson një mesatare të lartë krahasuar me vendet e Bashkimit Evropian.
“Rikthimi i fidanishteve shtetërore është një domosdoshmëri kombëtare, sepse duhet të zgjerojmë ripyllëzimin e territoreve të degraduara nga zjarret dhe erozioni, por edhe të shtojmë sipërfaqet pyjore pranë infrastrukturës rrugore”, tha Jaupaj.
Gjatë konferencës u prezantua edhe Plani Kombëtar i Ndryshimeve Klimatike 2026-2036, i cili parashikon 66 masa prioritare për të rritur qëndrueshmërinë e vendit ndaj efekteve të ndryshimeve klimatike, përfshirë zjarret dhe përmbytjet.