Reshjet e dendura të shiut, moti si në vjeshtë nuk na kanë dhënë ende ndjesinë se jemi në prag të verës dhe nuk kemi nxjerrë ende veshjet e stinës. Por kjo situatë do të ndryshojë në fund të majit, kur temperaturat do të shkojnë në 40 gradë Celsius.
Sipas ilMeteo.it, javët e ardhshme të majit do të jetë verë dhe plot diell pasi një valë e nxehtë afrikane do të përfshijë gjithë Europën, madje deri në Britani. Për momentin kjo valë ka kapur Spanjën dhe Portugalinë ku temperaturat kanë arritur tashmë 35 gradë Celsius. Gradualisht do të nisë këtë fundjavë dhe në rajonin tonë, ku temperaturat do të shkojnë në 30 gradë. Por në javën e fundit të majit kjo valë afrikane do të mbërrijë dhe në rajonin tonë, me temperatura të larta. Kështu që përgatituni për plazh.