Rreth një vit më parë deputeti demokrat Agron Shehaj premtoi se rrogën e tij të deputetit do e jepte për gjashtë motrave nga Kukësi të mbetura jetime, pas ikjes së prindërve. Dhe kështu ka bërë gjatë gjithë kësaj kohe.
I ftuar në mesditë në News 24, deputeti Shehaj pasi foli për situatën politike në vend u pyet nga moderatorja nëse tani që nuk ka më rrogë deputeti a do të ndihmojë vajzat. Ai u përgjigj se gjashtë motrat nuk kanë të ardhura të tjera veç ndihmës së tij duke premtuar se do të vijojë ta bëjë këtë gjë.
“Do vazhdoj të jap të njëtjën shumë që jepja më parë, jo nga rroga e deputetit por të ardhurat e mia personale”, u zotua Shehaj, duke thënë se nuk ka rëndësi djegia e mandatit.
Kujtojmë se Agron Shehaj krahas deputet i PD-së, është një prej sipërmarrësve më të suksesshëm në Shqipëri. Ai është themelues i disa prej kompanive të suksesshme brenda dhe jashtë vendit kryesisht për ofrimin e produkteve dhe shërbimeve të marketingut online për tregjet europiane.