Mendohej se koronavirusi do të ndikonte ndjeshëm mundësitë e klubeve shqiptare për të realizuar transferime jashtë kampioatnit tone. Por duket se kjo verë nuk do të jetë e tillë. Shumë emra lojtarësh janë piketuar nga klube në kampionate të ndryshme dhe me hapjen e merkatos, pritet të ketë disa lëvizje të emrave të njohur të Superiores drejt destinacioneve të tjera në kontinent për të bërë hapin e radhës në karrierë.
Një kampionat që po shfaq gjithnjë e më shumë interes për futbollistët shqiptarë është ai turk, me kategorinë e dytë në këtë vend që ka filluar të bëhet destinacion i preferuar. Klubi i Menemenspor ka tashmë në radhët e tij dy shqiptarë, Selmanin e Domgjonin, por ka shfaqur interes edhe për disa të tjerë duke vënë në listen e dëshirave Kallakun, Muçin e Çinarin. Gjithsesi, nuk janë vetëm këta lojtarë, pasi sipas burimeve në Turqi, ai ka piketuar një tjetër futbollist nga Superiorja, më saktësisht nga Partizani.
Bëhet fjalë për titullarin e mbrojtjes, Eneo Bitrin, i cili në këtë sezon u kthye në një alternativë të parë për prapavijën e të kuqve dhe mendohej se do të ishte pjesë e një projekti afatgjatë në kryeqytet. Por nga Turqia insistojnë se klubi i Menemenspor është gati ta afrojë atë në merkaton e verës për ta bashkuar me Domgjonin në prapavijën e vet dhe do të nise kontaktet me Partizanin që javën e ardhshme për të mundësuar transferimin e 23-vjeçarit.