Shumë shpejtë do të nisë dhe testi i drogës për drejtuesit e automjeteve, krahas atij të përdorimit të alkoolit. Sipas asaj që raporton Euronevvs Albania, aktualisht po shihet mundësia e blerjes së disa pajisjeve që përdoren në shumë vende të Bashkimit Europian.
Përmes pështymës, pajisja është e aftë të nxjerrë pas 5 minutave rezultatin nëse një drejtues mjeti është nën efektin e narkotikëve.
Ajo përcakton nëse ka konsumuar kanabis, kokainë apo lëndë të tjera. Të tilla teste u aplikuan një muaj më parë gjatë disa patrullimeve me efektivë të policisë rrugore çeke që vizituan Shqipërinë.
Burime nga Policia e Shtetit bëjnë me dije se po shikohen edhe modele të tjera më të sofistikuara të testit të drogës madje disa janë marrë në dorëzim.
Ndalimi i përdorimit të lëndëve narkotike ose psikotrope parashikohet edhe në kodin rrugor, por aktualisht kontrollet kryhen vetëm në rastet kur ka dyshime pas aksidenteve, nëpërmjet analizave laboratorike.
Aplikimi i testit të drogës për shoferët shihet si një mundësi për të parandaluar ngjarjet rrugore, ndërsa të hënën ministri i Brendshëm, Sandër Lleshaj e shpalli 2020-n vitin e sigurisë rrugore.