Jonida Maliqi akuzoi publikisht Radiotelevizionin Publik Shqiptar se nuk e ka paguar pasi u shpall fituese e Festivalit të Këngës vitin e kaluar.
Në dhjetor, Jonida Maliqi u shpall fituese e konkurrimit me këngën “Ktheju Tokës”.
Në maj, ajo e interpretoi këngën live në Izrael, si përfaqësuese e Shqipërisë në Eurovision Song Contest.
Në intervistën e fundit të Jonida Maliqit, si e ftuar në emisionin “Treshat” në Vizion Plus, këngëtarja u shpreh se jo vetëm nuk është paguar ende nga institucioni organizues i Festivalit të Këngës, Radiotelevizioni Publik Shqiptar, por faktin se duhet të merrte një pagesë e ka mësuar nga kolegët të cilët janë shpallur fitues para saj.
“Ende nuk ma kanë konfirmuar. E kam marrë vesh nga kolegët e mi dhe nga ata që kanë qenë më parë pjesëmarrës. Nuk i kam marrë ato para”.
Jonida Maliqi tha se nëse do të ketë para për të marrë do t’i marrë patjetër.
Nuk është hera e parë që Jonida Maliqi shprehet hapur në lidhje me financimin nga ana e RTSH- së sa i takon fituesit të Festivalit të Këngës.
Në shkurt, në një intervistë për “City Radio”, ajo u shpreh se fondet për performancën e Shqipërisë në Eurovision janë të pamjaftueshme. Për këtë, ajo u shpreh se iu desh të trokiste vetë në dyert e sipërmarrësve shqiptarë për të siguruar të ardhura.