Julka Gramo dhe Andi Islami kanë 20 vite bashkë dhe sot kanë një familje të lumtur. Mbrëmjen e sotme e ftuar në emisionin “Mos i fol shoferit”, Julka ka rrëfyer detaje nga njohja me Andin dhe si ka marrë propozimin për martesë pas 10 vitesh lidhje. Ajo ka treguar se me bashkëshortin e saj është njohur në radion e parë private shqiptare dhe se Andi ja kishte bërë gjërat të qarta që në fillim, nuk dëshironte të ishte mik i saj. Julka ka rrëfyer më tej se të gjithë insistonin të martohej me Andin, pasi ai kishte letra italiane. Moderatorja ka shtuar se nuk dëshironte të martohej me të vetëm për letra dhe se pritja prej 10 vitesh për propozimin për martesë ja vlejti.
“Kur unë bëja 30 vjec, gjatë darkës nxjerr një gjë dhe mban një fjalim shumë të bukur, që na emocionoi të gjithëve. Ndërkohë që nuk kishte qenë këtu, kishte qenë në Itali. Ja vlejti pritja se ishte një emocion shumë i bukur. Ditën e nesërme, packa se kishim shumë vite me njëri-tjetrin dhe bashkëjetonim, ishte një ndjesi shumë e bukur. Kurrë nuk e kam pas thënë burri apo gruaja, nuk e di pse kjo fjala më bezdis shumë. Edhe sot e kësaj dite qeshim kur them, ‘Ky është Andi, i dashuri im.’ ‘Si the mi, si the?”‘(Ia kthen ai.) kemi 20 vjet bashkë, kemi kalama, por është i dashuri. Të dashur e konsideroj akoma. Ndonjëherë kur jam me nerva, i them dhe burrë”, është shprehur Julka. Sot ajo dhe Andi janë prindër të dy djemve, Ian, i cili ka ardhur në jetë pak kohë pas propozimit për martesë, dhe Greg.
