Juventusi e ka kaluar menjëherë “traumën“ e humbjes së Napolit dhe është rikthyer te fitorja ditën e sotme. Bardhezinjtë kanë likuiduar Fiorentinën pastër me rezultatin 3-0, me një dopietë të Ronaldos dhe golin e De Ligt. Gjatë 45 minutëshit të parë Fiorentina ka pasur disa raste të pastra në portën e Juventusit, por pa arritur të shënojë.
Pas kësaj Juventusi mori frenat e lojës dhe arriti të gjejë rrjetën në minutën e 40 me një penallti të shënuar nga Ronaldo. Edhe goli i dytë ka ardhur me të njëjtën mënyrë dhe të njëjtin shënues 40 minuta më pas. De Ligt ka menduar të trefishojë rezultatin pas një krosi të Dibalas dhe goditjes me kokë të holandezit. Ky triumf e mban në vendin e parë ekipin e Sarrit, gjashtë pikë më shumë se Interi, me zikaltërit, që luajnë në mbrëje kundër Udinezes.
Kjo ndeshje ishte e 50-ta ndeshje e Ronaldos në Serie A, ku ka arritur të shënojë 40 gola dhe 10 asiste, që do të thotë se ka kontribuar në një gol për çdo ndeshje. Gjithashtu, një rekord historik për Juventusin, që pas këtij triumfi është skuadra e parë, që arrin shifrën e 1600 fitoreve në historinë e Serie A.