Urreni të shihni njerëzit që luajnë me diçka? Nuk je i vetmi sepse mund t’i përkasësh një grupi njerëzish që vuajnë nga misokinezia. Mos e ngatërroni me mizofoninë, e cila shkakton reagimin negativ ndaj tingujve apo zhurmave të caktuara.
Kërkuesit në Kanada rekrutuan 4100 pjesëmarrës vullnetarë që raportonin nëse kishin ndonjë lloj ndjesie kur shihnin njerëzit të luanin me diçka apo kryenin lëvizje të përsëritura. Nga vëzhgimi, rezultoi se 1 në 3 njerëz përjetonte fenomenin psikologjik të njohur si mizokinezia, ose “urrejtja ndaj lëvizjeve”.
Mizokinezia është një përgjigje psikologjike ndaj veprimeve të vogla lëvizëse të një personi tjetër, por që mund të ndikojë seriozisht jetën e përditshme. Këta njerëz ndikohen negativisht, përjetojnë reagime emocionale si zemërimi, acarimi, ankthi apo frustrimi dhe kanë dëshirë të reduktuar për ngjarjet sociale, ambientet shoqërore apo të punës.
Nuk ka ende një shpjegim të qartë për shkakun, edhe pse mendohet se një arsye mund të jenë neuronet-pasqyrë, të cilat ndikojnë në ndjenjën e empatisë. Megjithatë, ky studim i hapi rrugën studimit të mizokinezisë dhe kuptimit më të plotë të saj në të ardhmen.