Nikolas Burdiso është një nga ata emra që njeh mirë Zhoze Murinjon. Ish-mbrojtësi argjentinas, tashmë drejtues te Boka Juniors, ka qenë për disa vite nën drejtimin e portugezit te Interi, ndaj e ka cilësuar si një lëvizje të shkëlqyer atë që ka bërë Roma duke afruar teknikun për të ndërtuar një cikël. Në një intervistë të dhënë për mediat italiane, Burdiso ka treguar bindjen se Murinjo mund të nisë një cikël fitues në Romë dhe nga ai mund të përfitojnë të gjithë lojtarët për t’u përmirësuar individualisht, sidomos mbrojtësit si Kumbulla e Ibanez.
“Aftësia e tij kryesore është të ndërtojë një raport special me njerëzit, diçka që shkon përtej futbollit. Ka një eksperiencë të çmendur dhe një raft me trofe që të fut frikën. Po vjen dikush që mund të bëhet një perandor.
Sipas meje do të nisë një cikël. Të fitosh në Romë nuk është e thjeshtë dhe të vendosësh objektiva përtej realitetit nuk është e drejtë. Por Murinjo është një trajner fitues me një bagazh eksperience të jashtëzakonshme. Sipas mendimit tim, do të duhen pak afrime, pasi grupi është i ndërtuar mirë. Ai i shton karizëm dhe lidership.
Jam i bindur se Pelegrini me të do të bëjë një tjetër hov cilësor. Ibanez dhe Kumbulla do të përmirësojnë rendimentin e tyre, pasi Murinjo bën një organizim të madh të fazës mbrojtëse, por pres që edhe Veretu të jetë thelbësor”, ishte analiza që Burdiso i bëri të ardhmes së Romës nën drejtimn e Murinjos.