Kandidatët për zgjedhjet e pjesshme lokale të 6 marsit në Bashkinë e Dibrës kanë nisur takimet me zgjedhësit derë më derë si dhe debatet në rrjetet sociale.
Kandidati socialist Rahim Spahiu është takuar sot me biznemenë të qytetit Peshkopisë. Ai u shprehet se: “Është përherë kënaqësi të takoj bashkëqytetarët e mi dibranë! Dyfish kënaqësi kur takoj njerëz të suksesshëm në fushën e biznesit dhe punëtorë të palodhur që nuk e kanë humbur vullnetin t’i japin shumë qytetit.”
Premtim Kryemadhi, kandidati i koalicionit “Shtëpia e Lirisë” postoi foto nga bulevardi “Elez Izufi” dhe kritikoi bashkinë e cila sipas tij nuk e largoi borën dhe akullin, duke bërë që pllakat prej guri të dëmtohen rëndë. Ai kërkoi reagimin e qytetarëve për ndryshimin e gjendjes.
Ndërkohë kandidati i PD-së Luan Haka ka vijuar takimet në fshatra duke kritikuar pushtetin lokal se nuk ka bërë sa duhet për pastrimin e rrugëve rurale, për sigurimin e ngrohes në shkolla dhe mirëmbajtjen e infrastrukturës në qytetin e Peshkopisë.