Ndërsa Greqia pritet të mbajë të dielën zgjedhjet lokale, një kandidat për kryetar bashkie u arrestua dhe u mbajt në paraburgim. Bëhet fjalë për kandidatin e Mesolongjit, Panajotis Kaculis.
Sipas mediave të vendit fqinj, ai u arrestua se kishte mbajtur fjalimin e fushatës, një ditë më para nga koha që kishte marrë leje. Leja i ishte dhënë për të enjten, por Kaculis e organizoi mitingun të mërkurën.
“Shpreh kritikë ndaj të gjithë atyre, kushdo qofshin dhe këdo që përfaqësojnë, që në kushtet e demokracisë kërkojnë përmes rrugëve të nëndheshme të pengojnë shprehjen dhe vullnetin e lirë të qytetarëve. Ne jemi besimtarë të ligjshmërisë. Shprehja e ligjshmërisë ka të bëjë me të gjithë ne dhe në radhë të parë ne që e mbrojmë atë. Në këtë kuptim, arrestimi i djeshëm ishte i ligjshëm. Por kjo u bë në rrethana ku fatkeqësisht, tre ditë pas zgjedhjeve, çdo ndjenjë legjitimiteti në qytetin tonë është shkatërruar“, tha Kaculis në një reagim në rrjetet sociale.