Skena dëshpërimi të shkaktuara nga uria në Gaza. Palestinezët mësynë të martën një prej pikave të shpërndarjes së ndihmës humanitare nga Fondacioni për Gazën, i mbështetur nga SHBA-të dhe Izraeli.
Situata doli jashtë kontrollit pasi Izraeli synoi të kryente kontrolle biometrike të palestinezëve në prag urie. Personeli amerikan i sigurisë u tërhoq dhe i la ndihmat të pambikëqyrura.
Deri në fund të pasdites së së martës, Fondacioni Humanitar i Gazës tha se kishte shpërndarë rreth 8,000 pako ushqimore, ekuivalente me rreth 462,000 vakte. Kjo vjen pas heqjes së bllokadës mbi tremujore të Izraelit.
“Ne duam të hamë, jemi të uritur, na kanë poshtëruar me ato kuzhinat e përbashkëta dhe me (mungesën) e ujit dhe gjithçka tjetër. Shikoni çfarë kanë vendosur për ne”, thotë një refugjat palestinez.
Një organizatë e re për shpërndarjen e ndihmave, e mbështetur nga SHBA-ja dhe Izraeli, ka filluar punën në Gaza. Nën emrin Fondacioni Humanitar i Gazës, organizata tha se disa kamionë me ushqime ishin dërguar në vende të sigurta të hënën dhe se shpërndarja kishte filluar.
Fondacioni synon të anashkalojë OKB-në si furnizuesin kryesor të ndihmës për 2.1 milionë palestinezë në Gaza, ku ekspertët kanë paralajmëruar për zi buke.
Në qytetin jugor Rafah, i cili është nën kontrollin e plotë të ushtrisë izraelite, mijëra vetë, përfshirë gra dhe fëmijë – disa në këmbë, të tjerë me karroca me gomarë – u dyndën drejt një pike të shpërndarjes së pakove ushqimore.
Izraeli dhe Fondacioni Humanitar i Gazës thanë, pa dhënë prova, se Hamasi ishte përpjekur t’i bllokonte civilët. Hamasi e mohoi akuzën.
Disa treguan përmbajtjen e pakove, e cila përfshinte pak oriz, miell, fasule të konservuara, makarona, vaj ulliri, biskota dhe sheqer.
Zëdhënësi i OKB-së, Stephane Dujarric, i quajti pamjet e incidentit “zemërthyese”. Ai shtoi se operacioni është “shpërqendrim nga ajo që nevojitet në të vërtetë” dhe i kërkoi Izraelit të rihapë të gjitha pikat kufitare.