Nuk ka qetësi te Flamurtari. Përkundrazi. Situata sa vjen edhe përkeqësohet. Ekipi kuqezi gjendet në kaos total. Tashmë shpërbërja e ekipit është fakt dhe nuk ka filozofi që e shpjegon katrahurën në Vlorë. Situata financiare është arsyeja e vetme pse po shkatërrohet gjithçka, por nga klubi kuqezi nuk flet askush.
Tomislav Busic iku dje, sot firmosi tek Teuta, pa buzëqeshje. Vuajti disa muaj, tashmë dëshiron vetëm qetësi dhe pagat në kohë. Sot e ka pasur radhën Goran Siljanovski të largohet. Maqedonasi ka marrë dokumentacionin dhe është larguar nga Vlora, duke u kthyer në shtëpi. Mbrojtësi i djathtë më i mirë në Superiore, për shumë njerëz, tashmë është pa ekip, por nuk do mbetet gjatë i tillë, e duan në Shqipëri e Maqedoni.
Kush e ka radhën? Të gjithë janë me valixhe në duar, ndeshja në Durrës ste dielën merr përmasa absurde dhe nuk dihet a do jetë Ilir Daja në stol javën e ardhshme. Lojtarët e mbetur kanë marrë premtim se do paguhen brenda 1 jave, por kush beson?
Sinan Idrizi ka probleme me bashkitë dhe shtetin shqiptar, këtë e dinë të gjithë, por a mjafton kaq për të firmosur kontrata dhe për të mos i respektuar? Katastrofa po afron, Flamurtari do të duhet të festojë gjatë nëse mbijeton nga kjo stuhi.