Të papranueshme e ka cilësuar deputeti i PS Lavrdim Krashi sjelljen e deputetëve të Rithemelimit dhe të deputetëve mbështetës të Gazment Bardhit në Kuvend. Në një emision televiziv Krashi tha se ata nuk janë përjashtuar nga Kuvendi por kanë zgjedhur të vetë-përjashtohen ndërsa u ka bërë thirrje për reflektim.
“Situata është vetë-krijuar nga deputetët e opozitës. Kur shkojnë në darkë në shtëpi e kuptojnë se sjellja e tyre është e papranueshme, nuk është sjellje qytetare dhe aq më pak nuk përfaqëson ata që i kanë zgjedhur. Unë them çfarë mendoj unë. Unë flas si qytetar. Si qytetar sjellët tona duhet të jenë në përpikmëri aq sa është e mundshme të jenë në përpikmëri. Nuk është kjo mënyra si mund të zgjidhen gjerat. Nëse Dogjani apo Mediu është ndaluar pa të drejtë ditën e hënë, edhe sikur të jetë e vertëte, pra të kishin 100% të drejtë, mënyra si e kërkojnë ata zgjidhjen nuk është e saktë.
Këta janë vetë-përjashtime sepse ata e dinë rregulloren. Se po dëgjoj që flitet për përjashtim. Jam çuditur me mënyrën si trajtohen deputetët në Shqipëri, sillen si në tokat e nënës apo babait e bëjnë ç’të duan. Deputetët janë shërbëtorë publikë. Sjellja e tyre është krejt e papranueshme”, tha Krashi.