Ministri i Shtetit për Marrëdhëniet me Parlamentin, Toni Gogu ka reaguar pas kaosit që shoqëruan seancën plenare, duke shprehur keqardhjen që në Kuvend nuk mbizotëroidebati parlamentar, por dhuna. Gogu thekson se dhuna nuk është alternativë politike dhe se kaosi nuk e zëvendëson votën e shqiptarëve. Ai sqaroi se projektligjet e përfshira në rendin e ditës së Kuvendit, u miratuan pasi siç nënvizon ai “shteti nuk mund të ndalet dhe nuk mund të kalojë në papërgjegjshmëri”.
“Sot në Kuvend bëmë atë që qytetarët na kanë ngarkuar: të votonim ligje! Duke debatuar e duke miratuar ligje që u shërbejnë atyre, për ekonominë e tyre, për mbrojtjen sociale të tyre dhe zhvillimin e vendit tonë. Fatkeqësisht, kjo seancë u shoqërua jo me debate parlamentare, jo me përplasje argumentesh, por me një dhunë rruge dhe një kaos që vjen vetëm nga çoroditja. I patë. U zunë vendet, karriget.
Tentativat për të bllokuar punën e kuvendit. E kemi thënë qartë në fillim të sesionit, e themi qartë edhe sot: dhuna nuk është alternativë politike dhe ne nuk do rrimë as ta dëshmojmë; kaosi nuk e zëvendëson votën e shqiptarëve dhe flakadani nuk bën dot ligje. Ligjet i bëjnë njerëzit”, shkruan Gogu.
Ky i fundit u ndal dhe te sjelljet e opozitës në Kuvend me ndezje flakadanësh e përmbysje karrigesh, duke I konsideruar si dëshpëruese. “E vërteta duhet parë në sy. Kjo opozitë është e dëshpëruar për një protestues më shumë ditën e hënë, për një kamerë më shumë. Dhe për të gjitha këto është gati të djegë Kuvendin e shqiptarëve. Dhe kur nuk bind dot me ide, përpiqet të imponohet me dhunë, me tym.
Ndërkohë që kemi zgjedhur rrugë tjetër: ligjet, punën dhe shërbimin për qytetarët. Ata kanë zgjedhur sherrin në ekran. Ne do zgjedhim vendimet. Vendimet për shqiptarët që bëmë sot. Parlamenti është shtëpia e demokracisë. Nuk mund të jetë skenë dhune. Debati bëhet me fjalë, ku përplasen idetë. Vendimet merren me vote”, thekson Gogu.