Disfata e Juventusit përballë Barcelonës duket se ka çuditur Fabio Kapelon. Ish-trajneri i bardhezinjve, në analizën e tij pas ndeshjes, ka deklaruar se Juventusi nuk duhej të pretendonte të krahasohej me katalanasit.
“Juventusi ka vuajtur shumë. Ka luajtur kundër një Barcelone në krizë dhe megjithatë ka pasur një diferencë aq të madhe që më ka çuditur për një ekip italian që është në majë. Ishte një skuadër aq e shpejtë sa sot mund t’i bënin 8 gola. Por në fakt i shënuan dy gola në mënryë mjaft rastësore. Kjo më krijon shumë dyshime për atë që kemi ne në shtëpi”, theksoi Kapelo për paraqitjen e bardhezinjve.
Ndërkohë, sa i përket Lacios, ai ka cilësuar pozitive provën e skuadrës së Inzagit në kushtet ku ajo luajti. “Lacio u prezantua në këtë sfidë me një skuadër të sajuar, por në fushë luftoi dhe ishte e bukur për t’u parë. Në fund kishte edhe një rast të mire me Milinkoviç-Saviç për ta fituar sfidën. Unë kam parë një Lacio shumë të mirë”, tha ish-trajneri i njohur.