Policia e Kavajës ka vënë në pranga një 30-vjeçar me iniciale Xh.K. I riu është kapur për veprën penale të “Vjedhjes” gjatë operacionit të koduar “The Last”. Sipas uniformave blu, i riu ka kryer një seri grabitjesh të cilat janë zbardhur dhe dokumentuar.
“Prej muajit Gusht 2022 deri në momentin që u kap në flagrancë, nga shërbimet e Seksionit për Hetimin e Krimeve të Komisariatit të Policisë Kavajë, ky shtetas ka vjedhur 2 biçikleta, si dhe sende të ndryshme në 2 banesa dhe në 2 biznese, në Kavajë”, njoftoi policia.
Në bashkëpunim me Prokurorinë, vijon puna për dokumentimin e vjedhjeve të tjera që mund të jenë kryer nga ky person. Materialet procedurale i kaluan Prokurorisë pranë Gjykatës së Rrethit Gjyqësor Kavajë, për veprime të mëtejshme.