Antimafia Italiane ka arrestuar një nga 3 shqiptarët e shpallur në kërkim pas ekzekutimit më 19 korrik të operacionit të koduar “Tuneli”, i cili çoi në shkatërrimin e një grupi trafikantësh shqiptarë që tranportonin kokainë e marijuanë nga Shqipëria në Siçili. I arrestuari është Klaidi Kaca 30 vjeç. Ai u kap në portin e Brindizit ndërsa po nisej me një traget drejt vendlindjes.
Sipas prokurorisë së Mesinës mbi Klaidi Kacën rëndon akuza e trafikut të drogës, pjesëmarje në aktivitet kriminal e armëmbajtje pa leje. Operacioni “Tuneli” nisi hetimet në maj të viti 2017. Përgjimet në terren e ato telefonike kanë zbardhur ngjarjen, pasi transportoheshin sasi të konsiderueshme droge e tipit kokainë e marijuanë. Lënda narkotike pas mbërritjes në Itali vendosej në Messina e tregtohej në të gjitha zonat turistike të provincës siçiliane.
Në shtator të 2017-s antimafia italiane sekuestroi rreth 42 kg marijuanë e fshehur në galerinë hekurudhore “Spadalara”. Në dhjetor të 2017-s u sekustruan edhe sasi të tjera marijuane me peshë 32 kg që po trasportoheshin në bordin e automjeteve të bandës së drogës. Antimafia italiane informon se janë akoma në kërkim dy shqiptarët e tjerë, anëtarë të këtij grupimi trafikantësh. 30-vjeçari u transferua në burgun e Brindizit, ku do të mbahet nën vëzhgimin e autoritetit gjyqësor që dha masën kufizuese “arrest me burg”.