Punimet për zgjerimin e autostradës Tiranë-Durrës vijojnë me fazën e tretë, pas hapjes së gjashtë kilometrave të parë të aksit rrugor. Aktualisht, ndërhyrjet janë përqendruar në segmentin nga mbikalimi i Rinasit në drejtim të Limuthit.
Në këtë pjesë po punohet me intensitet për mbushjen e trupit të rrugës, ndërsa kanë përfunduar punimet për ndërtimin e mureve mbajtëse.
Ministri i Infrastrukturës dhe Energjisë, Enea Karakaçi, së bashku me drejtorin e Autoritetit Rrugor Shqiptar, Ami Kozeli, inspektuan nga afër ecurinë e punimeve, ku deri tani është realizuar rreth 30% e projektit.
Sipas Kozelit, kjo fazë e kontratës parashikon zgjerimin e trupit të rrugës në tre korsi, plus një korsi emergjence. Projekti përfshin gjithashtu ndërtimin e nyjes në disnivel të Laknasit dhe një mbikalimi të ri në Kashar.
“Ky mbikalim do të jetë me strukturë metalike me gjatësi 94 metra”, deklaroi Kozeli.
Synohet përfundimi sa më i shpejtë i punimeve
Hapja e gjashtë kilometrave të parë ka lehtësuar ndjeshëm qarkullimin e automjeteve, ndërsa puna po vijon për zgjerimin e aksit deri në drejtim të Limuthit.
“Pas dy fazave që janë përmbyllur me sukses dhe që është e dukshme pasi trafiku është zhbllokuar me tre korsi deri në mbikalimin e Rinasit, tashmë jemi në punimet për përfundimin e zgjerimit deri në drejtimin e Limuthit”, tha ministri Karakaçi.
Sipas tij, synimi është që faza e tretë të përfundojë brenda një kohe sa më të shpejtë, për të lehtësuar lëvizjen e automjeteve edhe në këtë segment të autostradës.
Ministri kërkoi gjithashtu që projekti të marrë në konsideratë shqetësimet e komunitetit dhe bizneseve që operojnë përgjatë aksit, veçanërisht sa i takon aksesit në rrugën kryesore.
Mbikalimet për këmbësorët, në fokus
Sa i përket mbikalimeve për këmbësorët përgjatë gjashtë kilometrave të parë të autostradës, Karakaçi tha se shqetësimet e ngritura nga banorët pak javë më parë kanë gjetur zgjidhje.
“Kantieri është i mobilizuar. Të kemi në vëmendje përmbylljen aty ku kemi mundësi edhe të atyre problematikave që kanë ngritur banorët, aty te nyja e Rinasit, të vazhdohet me prioritet për sa i përket mbikalimeve që bëjnë edhe ndërlidhjen e banorëve dhe që ka qenë shqetësim i shtuar”, u shpreh ministri.
Zgjerimi i autostradës Tiranë-Durrës synon rritjen e kapacitetit të aksit dhe lehtësimin e trafikut në një prej segmenteve më të ngarkuara rrugore në vend.