Karantina në Shqipëri për të prekurit me Covid do të ulet në 7 ditë. Burime zyrtare për Tv Klan bën me dije se Shqipëria do të ndjekë shembullin e shumicës së vendeve të tjera të Europës.
Instituti i Shëndetit Publik ka bërë gati draft ndryshimet për masat antiCovid, që priten të rekomandohen në mbledhjen e Komitetit Teknik të Ekspertëve dhe të miratohen nga Ministria e Shëndetësisë.
Aktualisht, të prekurit me Covid janë të detyruar të qëndrojnë në kushte karantine në shtëpi dhe të shkëputen nga puna, 14 ditë.
Pak ditë më parë, edhe ministrja e Shëndetësisë Ogerta Manastirliu bëri me dije se në mbledhjen e radhës të Komitetit Teknik të Ekspertëve, përveç uljes së ditëve të qëndrimit në karantinë do të diskutohet edhe ulja e pragut për dozën e tretë përforcuese.
Sipas ekspertëve, situata në Shqipëri konsiderohet e qëndrueshme pavarësisht rritjes së numrit të infektimeve.