Partia Demokratike e drejtuar nga Enkelejd Alibeaj ka ankimuar në Kolegjin Zgjedhor vendimin e KAS, që rrëzoi kërkesën e PD-së për të moslejuar kandidimin në zgjedhje të kandidatit të PS-së për Mallakastrën, Qerim Ismailaj.
Shorti për përcaktimin e trupës gjykuese do të hidhet ditën e nesërme, datë 22.04.2023 në orën 09:00 në ambientet e Gjykatës Administrative të Apelit.
NJOFTIM PËR MEDIA
Në datën 22.04.2023 ora 09:00, në ambientet e Gjykatës Administrative të Apelit, në adresën: Rr.“Ismail Qemali”, Tiranë, do të hidhet shorti për përcaktimin e trupit gjykues për gjykimin e kërkesëpadisë Nr.16 Regj.Themeltar, Datë 21.04.2023 Regjistrimi, me:
PADITËS: Partia Demokratike e Shqipërisë, përfaqësuar nga Indrit Sefa.
I PADITUR: Komisioni Qendror i Zgjedhjeve – KQZ.
OBJEKTI: Shfuqizimi i vendimit nr. 60, datë 19.04.2023 të KAS “Për shqyrtim të kërkesës ankimore nr. 49, datë 17.04.2023, të depozituar nga “Partia Demokratike e Shqipërisë”.
Shfuqizimi i vendimit nr. 366, datë 15.04.2023, të Komisionerit Shtetëror të Zgjedhjeve “Shqyrtimin e kërkesës së Partisë Demokratike dhe verifikimin e të dhënave në formularin e vetëdeklarimit të subjektit vetëdeklarues z. Qerim Ismail Ismailaj, kandidat për Kryetar të Bashkisë Mallakastër, i propozuar nga subjekti zgjedhor “Partia Socialiste e Shqipërisë” për zgjedhjet për organet e qeverisjes vendore të datës 14 Maj 2023”.
Ndalimin e kandidimit të Kandidatit për kryetar Bashkie të Mallakastrës, shtetasit Qerim Ismail Ismailaj, të propozuar nga Partia Socialiste e Shqipërisë.
Për dijeni, Komisioneri Shtetëror i Zgjedhjeve, me Vendimin nr.366, datë 15.04.2023, ka vendosur:
“1. Mospranimin e kërkesës së subjektit zgjedhor Partia Demokratike për moslejimin e z. Qerim Ismailaj për të kandiduar si kandidat për kryetar në Bashkinë Mallakastër për zgjedhjet për organet e qeverisjes vendore të datës 14 Maj 2023.
- Kryerjen e verifikimit të thelluar të subjektit vetëdeklarues z. Qerim Ismail Ismailaj, kandidat për kryetar bashkie i propozuar nga subjekti zgjedhor “Partia Socialiste e Shqipërisë” për Bashkinë Mallakastër dhe dërgimin e të dhënave përkatëse Prokurorisë së Përgjithshme për vlerësim të mëtejshëm.
- Ky vendim hyn në fuqi menjëherë dhe publikohet në faqen elektronike zyrtare të Komisionit Qendror të Zgjedhjeve.
- Kundër këtij vendimi mund të bëhet ankim në Komisionin e Ankimimeve dhe Sanksioneve brenda 3 (tre) ditëve nga shpallja e tij”.
Ndërsa Komisioni i Ankimimeve dhe Sanksioneve, me Vendimin nr.60, datë 19.04.2023, objekt i kërkesëpadisë së mësipërme, ka vendosur:
“1. Rrëzimin e kërkesës ankimore nr.49, datë 17.04.2023, të paraqitur nga “Partia Demokratike e Shqipërisë”.
- Lënien në fuqi të vendimit nr.366, datë 15.04.2023, të Komisionerit Shtetëror të Zgjedhjeve “Për shqyrtimin e kërkesës së Partisë Demokratike dhe verifikimin e të dhënave në formularin e vetëdeklarimit të subjektit vetëdeklarues z. Qerim Ismail Ismailaj, kandidat për Kryetar të Bashkisë Mallakastër, i propozuar nga subjekti zgjedhor “Partia Socialiste e Shqipërisë” për zgjedhjet për organet e qeverisjes vendore të datës 14 Maj 2023.
- Ky vendim hyn në fuqi menjëherë dhe publikohet në faqen elektronike zyrtare të Komisionit Qendror të Zgjedhjeve;
- Kundër këtij vendimi mund të bëhet ankim në Kolegjin Zgjedhor te Gjykatës së Apelit Administrativ brenda 5 (pesë) ditëve nga shpallja e tij”.
Tiranë, më 21.04.2023
Gjykata Administrative e Apelit Tiranë