Antonio Kasano duket se i ka shpallur luftë Masimiliano Alegrit, të cilin prej muajsh e kritikon ashpër për atë që po bën me Juventusin. Edhe pse bardhezinjtë ia dolën të siguronin Ligën e Kampioneve, për Kasanon, trajneri ka dështuar pasi me një skuadër me yje nuk ia ka dalë të jetë protagonist për titullin, aq më shumë pasi shpenzoi një shumë marramendëse për Vlahoviç.
“Thonë se nuk mund ta largojnë pasi fiton 10 milionë euro në vit, por unë them se duhet ta largojnë pikërisht për këtë. A e shihni se çfarë po bën?
Në janar Juventusi ka investuar 100 milionë euro dhe për këtë arsye do të arrijë e katërta. Vlahoviç po më duket simpatik edhe pa e njohur, i gjori, në katër muaj ka shënuar 4 gola te Juventusi.
Te Fiorentina ka shënuar 17. Tani i mungon edhe entuziazmi ndërsa dikush thotë që mesfushorët nuk i pasojnë. Po mundohen ende të shfajësojnë Alegrin, por a është e mundur që një sulmuesi i mirë, i ri, mes 20-vjeçarëve më të mirë në botë, të mos bëjë një gjuajtje në portë prej tre ndeshjesh?”, ishte akuza e Kasanos.