Kabineti i ri i Hong Kongut përfshin katër zyrtarë të lartë të shpallur “non grata” nga SHBA. Kjo është cilësuar si një përpjekje për të “ngacmuar” Kinën.
Shtetet e Bashkuara goditën me sanksione 11 zyrtarë të Hong Kongut dhe Pekinit dy vjet më parë pasi u vendos një ligj gjithëpërfshirës i sigurisë kombëtare për të shuar mospajtimet pas protestave masive të vitit 2019.
Shtatë ishin anëtarë të qeverisë së Hong Kongut dhe katër do të vazhdojnë në administratën e re, duke përfshirë udhëheqësin në pritje John Lee, ministrin e sigurisë Chris Tang, ministrin Erick Tsang dhe kryesekretarin e sapoemëruar për administratën Eric Chan.
Tre të sanksionuarit e tjerë ishin shefi i policisë i dalë në pension, Steven Lo, udhëheqësja e qytetit në largim, Carrie Lam dhe sekretarja për drejtësinë Teresa Cheng, e cila do të zëvendësohet.
Duke prezantuar kabinetin e tij të ri para gazetarëve të dielën, Lee tha se ai “tallej me të ashtuquajturat sanksione” dhe nuk u kushtoi vëmendje.
Emërimi i 26 zyrtarëve kryesorë vjen më pak se dy javë përpara se qeveria e re të marrë detyrën më 1 korrik. Ndërsa spekulimet kanë qenë të shfrenuara se Xi do të vizitojë Hong Kongun udhëtimi ende nuk është konfirmuar.
Një vizitë e tillë do të shënonte herën e parë që Xi ka udhëtuar jashtë territorit kinez që nga fillimi i pandemisë Covid-19. John Lee, 64 vjeç, një ish-shef sigurie që mbikëqyri goditjen e lëvizjes demokratike të Hong Kongut, u zgjodh si shefi i ardhshëm ekzekutiv nga një komitet i vogël besnikësh të Pekinit në fillim të majit.
Gjatë vizitës së Lee në Pekin për emërimin e tij zyrtar muajin e kaluar, Xi tha se Lee kishte “guximin për të marrë përgjegjësi” dhe “kishte dhënë kontribute për ruajtjen e sigurisë kombëtare dhe prosperitetit dhe stabilitetit të Hong Kongut”.
Lee ishte kandidati i vetëm në garë dhe mori 99 për qind të votave pasi Kina rishikoi sistemin zgjedhor të Hong Kongut në vitin 2021 për të siguruar që kushdo që konsiderohej jo patriotik do të ishte i papërshtatshëm për të kandiduar.
Sipas një plani të propozuar nga Lam, administrata e Lee do të zgjerohet, duke përfshirë shtimin e dy zyrave të reja dhe krijimin e tre posteve të zëvendëssekretarit për administratën, financat dhe drejtësinë.