Bastion historik i së djathtës Kavaja, por që vitet e fundit kishte ndëshkuar lidershipin e PD-së me votë proteste në mbështetje të së majtës, bashkia me 62.890 votues u rikthye në origjinë.
Pas fitores së bashkisë në vitin 2023, Kavaja i dha edhe një herë besimin demokratëve për Kuvendin e Shqipërisë. Me 10.626 vota ose 53.75 për qind, Partia Demokratike dhe Aleanca për Shqipërinë Madhështore mundën socialistët me një diferencë prej gati 2.900 votash.
Rezultati zhgënjyes për të djathtën në rang kombëtar e zbehu entuziazmin për këtë fitore të izoluar. ”Pjesa tjetër e Shqipërisë nuk na ndoqi, por ne vazhdojmë përpara”, tha kreu i Bashkisë, Fisnik Qosja.
Ndaj qeverisë së majtë, Qosja jo vetëm që nuk ka kritika, por edhe shtrin dorën e bashkëpunimit, me synimin për të mos e lënë bashkinë e tij një ishull të izoluar në hartën rozë. ”Ne nuk do të izolohemi, do të vazhdojmë bashkëpunimin me qeverinë, për të mirën e Kavajës”, tha Qosja.