Këngëtari Big Basta ka marrë pjesë nga Zelanda e Re në takimin virtual që ish-kryeministri Sali Berisha pati këtë të shtunë me diasporën shqiptare. Gjatë fjalës së tij, këngëtari u shpreh se dy nga arsyet kryesore për largimin nga Shqipëria, ishin edukimi i fëmijëve, si dhe mungesa e funksionimit të së drejtës së autorit për artistët.
Ai shtoi se duke parë shembullin e këngëtarëve të vjetër që nuk përmbushin dot shpenzimet mujore të familjes, mori vendimin për të emigruar për një të ardhme më të mirë për të dhe familjen.
“Edukimi i fëmijës tim ishte arsyeja pse zgjodhëm të emigronim në Zelandën e Re.
Një tjetër arsye që jam larguar është që ka investuar më shumë se gjysmën e viteve të jetës sime në muzike dhe po shoh tani që lufta për të drejtën e autorit është tashmë e humbur. Më vjen keq që sa herë një politikan publikon një libër me ideologji apo kujtime merr të ardhura nga e drejta e autorit, por sa herë një muzikant krijon duhet të përfitojë sa më shpejt nga çfarë t’i dalë më parë.
U frymëzova shumë nga artistët e vjetër të cilët me zor nxjerrin shpenzimet mujore për familjet e tyre dhe pashë veten time në të njëjtin pasqyrim. Kapa trenin e fundit për të investuar për të ardhmen e vetes time dhe familjes time. Prandaj me përulje ju lutem që kjo e drejtë autoriale apo pronësi intelektuale të jetë në plan kryesor me ardhjen e PD-së në pushtet”, tha Big Basta.