Nuk po gjen qetësi opozita parlamentare. Pas përpjekjes së dështuar për ta larguar nga drejtimi i grupit parlamentar nga një grup deputetësh të kryesuar nga Korab Lita, Rudina Hajdari deklaron se është kërcënuar me jetë nga një deputet, emrin e të cilit nuk e bën me dije.
Denoncimin e ka bërë përmes një letre drejtuar kreut të Kuvendit, por e ripërsëriti me zë dhe ne foltoren e parlamentit. Por si është e vërteta e këtij kërcënimi?
Gazetari investigativ Artan Hoxha ka komentuar kërcënimin e denoncuar sot nga deputetja e opozitës Rudina Hajdari.
I ftuar në “Opinion”, Hoxha është shprehur se Garda nuk ka konstatuar ndonjë gjë të dukshme pasi kërcënimi mendohet se ka ndodhur brenda në zyrë dhe aty nuk ka kamera sigurie.
“Në të gjithë rastet më thanë që Garda nuk ka konstatuar ndonjë gjë të dukshme. Problemi është që në zyrat e Kryesisë kamerat janë në korridor. Në zyrat e brendshme nuk ka kamera. Kërcënimi ka ndodhur brenda zyrës. Aty duket se ka një konflikt për drejtimin e grupit opozitar. Fakti që zonja Hajdari kërkon që të kontrollohen deputetët ka diçka, mos të të duket çudi që shkojnë edhe me pistoleta. Është verbal por nuk ka pasur vërtetë kërcënim. Figuron vetëm që një grup personash kanë hyrë në zyrë,“-tha Hoxha.
Nga ana tjetër, zv.ministri i Brendshëm Besford Lamallari ka bërë me dije se kanë nisur hetimet lidhur me rastin.
“Ka nisur procedurat për rastin dhe janë shtuar masat e sigurisë. Menjëherë pas deklaratës së saj në Kuvend,”-tha zv.ministri.