Fatmira Hajdari nuk do të jetë gjyqtare e dosjes CEZ në Apel! Vendimi është marrë nga Gjykata e Apelit të Tiranës, pas kërkesës së Kuvendit, me argumentin se ajo ka miqësi familjare me familjen Berisha, që janë të paditurit në këtë çështje.
Ditën e sotme gjyqtarja Edlira Petri e Gjykatës së Apelit ka marrë vendimin për përjashtimin nga çështja e privatizimit të CEZ gjyqtaren Fatmira Hajdari.
Hetimet për procedurën e privatizimit të Operatorit të Sistemit të Shpërndarjes nga kompania çeke ‘CEZ’ në vitin 2007, e cila u konsiderua korruptive, nisën në vitin 2016, duke dërguar përpara organit të akuzës një numër të lartë zyrtarësh të cilë u morën në pyetje, përfshirë edhe Shkëlzen Berishën, djalin e ish-kryeministrit Berisha. Kjo solli edhe ngritjen e një Komisioni Hetimor Parlamentar i drejtuar nga Taulant Balla, i cili në finale të tij arriti në konkluzionin se nga procedura e privatizimit të shtetit i ishte shkaktuar një dëm prej 414 milionë eurosh.
Megjithatë, gjyqtari Lazër Sallaku i njëjti që mbylli çështjen e lobimit rus për PD si dhe lirimin për 6 të dyshuarit e dosjes “Toyota Yaris”, pas një hetimi 3-vjeçar vendosi pushimin për dosjen ‘CEZ’ në Gjykatën e Tiranës, ku është i përfshirë edhe Shkëlzen Berisha, djali i ish-kryeministrit Sali Berisha. Një vendim i tillë u konsideruar nga kreu i grupit Parlamentar të PS-së, Taulant Balla, korruptiv nga një gjyqtar ‘KÇK’, e për pasojë e dërgoi çështjen në Apel.