Jemi mësuar të shohim burra në aktivitete kriminale, por duhet të njiheni me “mbretëreshën e kriptos”. Ruja Ignatova është në listën e 10 personave më të rëndësishëm, të shpallur në kërkim nga Byroja Federale e Hetimit (FBI) në SHBA. Për gjetjen e saj është vendosur edhe shpërblimi prej 100.000 dollarësh.
Ajo akuzohet se përmes mashtrimit ka mundur t’u zhvasë miliarda dollarë investuesve mendjelehtë në të gjithë botën. Sipas FBI-së, “ajo kërkohet për pjesëmarrje në një skemë shumë të përhapur mashtrimi, nëpërmjet kriptovalutës së rreme.
Muajin e kaluar, 42-vjeçarja u përfshi gjithashtu edhe në listën e personave më të kërkuar nga Europol, agjencisë evropiane të zbatimit të ligjit. Emri i saj nuk gjendet më në këtë listë dhe nuk është ende e qartë se pse dhe kur është fshirë emri i saj.
Ajo nuk është parë gjëkundi për më shumë se 4 vite.