Këshilli bashkiak Mat miraton ndryshimet, parkimi në Burrel 100 lekë/m2, largohen nga puna 21 punonjës

Sot këshilli bashkiak Mat ka miratuar buxhetin për vitin 2019 si dhe ndryshimet në strukturën organizative, tarifat lokale, etj. Gjatë diskutimit për paketën fiskale të këtij viti u ndryshua vetëm taksa e ndikimit në infrastrukturë dhe taksa e zënies së hapësirave publike. Për të parën është rënë dakort që nivelet të jenë minimale, aq sa lejon ligji. Ndërsa për taksën e zënies së hapësirave publike u vendos 100 lekë/m² në njësinë administrative Burrel, pra në qytet, dhe 50 lekë /m² për tetë njësite e tjera. Në Macukull, Derjan, Rukaj, Ulëz, Baz, Komsi, Lis taksa e parkimit ishte 60 dhe 30 lekë/m², tani do të jetë unike 50 lekë/m² për të njëjtën sipërfaqe. Ajo që ra në sy ishte vendimi për heqjen nga puna të 21 punonjësve të ujësjellësave të fshatrave, largimin nga struktura e bashkisë dhe i kalojnë ndërmarrjes së ujësjellës-kanalizimeve Mat. Plani i  të ardhurave për vitin 2019 është në vlerën   411 433 000  lekë. Këshilltarët e komisionit të ekonomisë në këtë këshill konstatuan se; “niveli i investimeve është i ulët,  niveli  i pagave është i lartë dhe shpenzimeve operative janë të tilla, nuk kemi asnjë mundësi të realizimit të katër objektivave strategjike të vendosur nga bashkia, madje as fillimin e realizimit të tyre,  të ardhurat e parashikuara na duken të fryra sepse nuk mendojmë se do arrihet realizimi i tyre  në masën 100%”.