Këshilli Politik merr vendimin e parë, cakton 6 ekspertë për draftin e reformës zgjedhore

Këshilli Politik për Reformën Zgjedhore pas konstituimit në mbledhjen e sotme ka marrë edhe vendimet e para. Këshilli ka vendosur që të caktojë gjashtë ekspertë ligjorë për reformën zgjedhore, dy do të jenë nga opozita e bashkuar, dy nga komisioni, praktikisht një nga shumica dhe një nga opozita në parlament dhe dy të tjerë që do të jenë të jashtëm nga OSBE-ja. Opozita jashtë parlamentit nuk ka vendosur ende emrat, ndërsa Ilir Rusmajli dhe Viktor Gumi janë dy emrat e ekspertëve nga komisioni i reformës zgjedhore, që kanë qenë dhe do të vijojnë. Palët arritën në dakordësi që të miratojnë në parlament pa ndryshime, me konsensus të plotë, një draft të përbashkët, që pritet të miratohet jo më vonë se 15 marsi.