Në Kuvend diskutohet sot marrëveshja e sigurisë mes Shqipërisë, Britanisë dhe Emirateve të Bashkuara Arabe. Në fjalën e tij, kreu i Grupit Parlamentar i Partisë Demokratike, Enkelejd Alibeaj deklaroi se marrëveshja me Emiratet është thjeshtë shkëmbim të dhënash.
Ai theksoi se Shqipërisë i duhet një marrëveshje ekstradimi me këtë shtet, pasi Dubai është kthyer në strehën e shumë personazheve të krimit të organizuar shqiptar. Sipas tij, kjo do të ishte arritje, ndërsa theksoi se qeveria nuk po tregon vullnet për ta realizuar.
“Çfarë është kjo marrëveshje me Emiratet e Bashkuara Arabe? Dubai iu thotë gjë, banda e Durrësit, banda e Elbasanit, të gjitha bandat në këtë vend kanë gjetur parajsën e tyre në Dubai, në Emirate.
Ministrin e Brendshëm e kuptoj që thotë unë e kam bërë punë time. Kjo marrëveshje është shkëmbim të dhënash, që kanë dalë në mexhlis, që i ka kushdo sot në internet, të banditëve dhe gjithçka. Dhe kjo quhet një arritje? Do të duhet të ishte imazhi i Shqipërisë, teksa Emiratet kanë kërkuar këtë marrëveshje do të thotë se atyre iu ka lindur një problem. Shteti shqiptar do të duhet të kërkonte diçka tjetër, marrëveshjen e ekstradimit. Ministri nuk tregoi nëse ka kërkuar një marrëveshje ekstradimi me Emiratet. Kjo tregon mungesë vullneti për të luftuar krimi.
Është e vërtetë ajo që Salianji ka thënë këtu kërcet dyfeku, atje hapet shampanja. Kjo është një kambanë alarmi. Është kjo kapje nga krimi? Është parajsa për banditët”, deklaroi Alibeaj.