Kremlini konfirmoi vizitën që Kim Jong Un pritet të zhvillojë në Rusi ditët në vijim.
“Pas ftesës së Presidentit të Federatës Ruse Vladimir Putin, Presidenti i Çështjeve Shtetërore të Republikës Popullore Demokratike të Koresë, Kim Jong Un do të zhvillojë një vizitë zyrtare në Federatën Ruse në ditët në vijim”, thuhet në deklaratë.
Agjencia Qendrore e Lajmeve të Koresë së Veriut (KCNA) gjithashtu raportoi për këtë çështje më herët, duke pohuar se Kim Jong Un do të takohet me Vladimir Putin gjatë udhëtimit të tij në Rusi.
“Kim Jong Un, me ftesë të presidentit rus Vladimir Putin, së shpejti do të vizitojë Rusinë. Gjatë vizitës, Kim Jong Un do të takohet dhe do të zhvillojë negociata me presidentin Putin ”, tha agjencia e lajmeve koreano-veriore.