Kina ka reaguar për herë të parë pas përfundimit të zgjedhjeve në SHBA. Kina ka uruar Joe Biden dhe Kamala Harris për fitoren e zgjedhjeve presidenciale të SHBA-së.
Zëdhënësi i Ministrisë së Jashtme kineze Wang Wenbin në një konferencë në Pekin, theksoi se Kina i respekton zgjedhjet amerikane dhe se i kanë ndjekur reagimet nga bashkësia ndërkombëtare dhe nga SHBA-të.
“Ne kemi ndjekur reagimin në lidhje me këto zgjedhje presidenciale të SHBA si nga Shtetet e Bashkuara ashtu edhe nga bashkësia ndërkombëtare. Ne e respektojmë zgjedhjen e popullit Amerikan dhe i çojmë urime Z. Biden dhe Znj. Harris”, theksoi zëdhënësi i Ministrisë së Jashtme Kineze.
Kina ishte një nga të paktat vende që deri më tani nuk kishte dhënë komente mbi zgjedhjet, pasi Trump kundërshtoi rezultatet duke i cilësuar si të manipuluara.
Reagimi zyrtar i Pekinit ndaj fitores së Biden ishte relativisht i heshtur. Presidenti Xi Jinping nuk ka ofruar urime publike, ndërsa Ministria e Jashtme këtë javë dha përgjigje kryesisht të paqarta në një konferencë, duke shpresuar që administrata e re do të punojë në të njëjtin drejtim me Kinën si më përpara.