Rreth 40 marinarë u vranë, disa janë të zhdukur dhe shumë të tjerë u plagosën kur anija luftarake Moskva u fundos nga ukrainasit. Gazeta e pavarur ruse Novaya Gazeta Europe duke cituar nënën e një marinari që besohet se ishte në bord, theksohet se të 40 marinarët kanë vdekur, shumë të tjerë janë zhdukur e një pjesë e tyre ka mbetur e plagosur.E ëma e marinarit ka bërë të ditur se djali i saj i ka thënë në një telefonatë se Moskva, flamuri i flotës ruse të Detit të Zi, ishte goditur nga tre raketa nga territori ukrainas.
“Ai më mori në telefon dhe qante. Qante për shkak të asaj që kishte parë. Ishte e frikshme”, tha ajo, duke shtuar se ajo vetë ishte e tmerruar. E ëma u shpreh gjithashtu se ai nuk i kishte dhënë të gjitha detajet e asaj që kishte parë sepse ishte shumë e tmerrshme, duke shtuar se shumë nga të plagosurit kishin humbur gjymtyrët për shkak të shpërthimeve.
Gazeta nuk ka përmendur emrin e marinarit apo nënës së tij me qëllimin për t’i mbrojtur ata. Por ajo thotë se ka prova dhe dokumente që e bëjnë të besueshme se marinari po shërbente në flotën ruse.
Ministria ruse e mbrojtjes deri më tani nuk ka dhënë asnjë deklaratë për ndonjë viktimë në fundosjen e anijes.
Megjithatë, më herët u raportua se Radio Evropa e Lirë kishte konfirmuar vdekjen e ndërmjetësit Ivan Vakhrushev. Ndërkohë ministria postoi të shtunën video për të cilën thotë se marinarët e anijes takohen me komandantin e Marinës Ruse në Sevastopol. Ndërsa shkaku i fundosjes sipas Moskës është zjarri që ka rënë në bord dhe moti i stuhishëm edhe pse Ukraina pretendon se e goditi me dy raketa anijen e famshme ruse.