Publikimi i të dhënave të pagave të mijëra qytetarëve u shndërrua në skandalin e vitit për vendin tonë. Për gazetaren Klodiana Lala ky skandal ekspozon qytetarët ndaj botës së krimit.
Lala, tha në emisionin “Të Paekspozuarit”, se shqiptarët mund të jenë target për grupet kriminale, të cilat natyrshëm mund të shantazhojnë shumicën prej nesh.
“Ka skandale të tjera të cilat shihen brenda atyre listave të pagesave, ke psh, aty drejtorë tv të cilët paguhen me shifra të frikshme, kjo është një indice për të nisur hetimin për pastrim parash. Janë dhjetëra kompani që janë më humbje nga njëra anë dhe i shmangen taksave, dhe nga ana tjetër paguajnë paga milionëshe. Kush është tjetra më e rëndë, është publikuar e gjithë databaza e pagave. Grupet kriminale e kanë shumë të lehtë për ta ditur qe p.sh Ylli Rakipi merr x pagë, nesër mund të venë në target, për të shantazhuar dhe për ta gjobitur. Ne jemi të rrezikuar nga grupet kriminale”, tha ajo.