Ditën e djeshme është bërë i mundur bashkimi i dy anëve të tunelit kryesor të Murrizit në Rrugën e Arbrit. Ky është një lajm mjaft i mirë, kur dihet se punimet janë realizuar në një terren mjaft të vështirë dhe avancimi është shoqëruar me probleme serioze.
Formacionet e “buta” bënë që firma zbatuese e projektit të punojë me masa të forta sigurie, për të mbrojtur jetën dhe shëndetin e specialistëve si dhe për të mundësuar vijimin e gërmimeve në tunelin e Xibrit.
Tuneli i Murrizit është vepra kryesore e Rrugës së Arbrit. Ai ka një gjatësi afro 3.8 km dhe pritet të ketë ndikim të jashtëzakonshëm në qarkullimin e automjeteve. Vënia në funksionim e tij pritet të sjellë një rritje të qarkullimit në këtë aks rrugor që, që jo vetëm shkurton distancën mes qarkut të Dibrës dhe Tiranës, por shkurton me afro 100 km edhe distancën Tiranë-Shkup.
Tuneli kryesor ka dy korsi lëvizje me 3.75 metra si dhe trotuare me gjerësi 1.5 metra. Ai lidhet me tunelin e emergjencës me anë të 11 galerive. Ky i fundit ishte hapur në fillim të këtij viti. Në tunel tani do të vazhdohet me proceset e betonimit, gërmimet, vendosja e pajisjeve elektromekanike etj.