Në mbledhjen e zhvilluar pasditen e sotme me strukturat e Partisë Socialiste për Qarkun Dibër, u prezantua drejtuesi i ri politik i këtij qarku.
Sekretari i Përgjithshëm, Blendi Klosi, është transferuar në Qarkun e Durrësit, ndërsa Ulsi Manja rikthehet pas katër vitesh në vendlindjen e tij, duke marrë drejtimin politik të Dibrës.
Në fjalën e tij, Klosi vlerësoi angazhimin dhe përkushtimin e socialistëve në Mat, Klos, Bulqizë dhe Dibër, duke veçuar rezultatet e arritura në zgjedhjet vendore të vitit 2023 dhe ato politike të vitit 2025. Ai i ftoi strukturat të vijojnë punën për sfida dhe fitore të reja.
Nga ana e tij, Ulsi Manja falënderoi zgjedhësit e Qarkut Lezhë për besimin e dhënë ndër vite, ndërsa theksoi vendosmërinë për të vijuar punën me të njëjtin përkushtim në çdo qark të vendit.
“Kudo ndihemi si në shtëpinë tonë. Falënderoj çdo socialist që kontribuon me dëshirë dhe vullnet për forcën tonë politike. Jemi një familje e madhe dhe do të punojmë për të ruajtur e thelluar rezultatet e arritura”, u shpreh Manja.