Ministrja e Brendshme, Albana Koçiu, ka deklaruar se 16 efektivë të Policisë së Shtetit janë lënduar gjatë protestës së sotme të Partisë Demokratike, duke e cilësuar dhunën e ushtruar si barbare.
Koçiu, e cila vizitoi të lënduarit në QSUT, u shpreh se qëllimi i vetëm i kësaj proteste ishte goditja e punonjësve të Policisë së Shtetit.
“Kam kërkuar që të vendosen para përgjegjësisë të gjithë ata që sot u bënë pjesë e një dhune barbare. Qëllimi i vetëm i protestës së sotme ishte goditja e punonjësve të Policisë së Shtetit”, deklaroi ministrja.
Sipas saj, nga dhuna e ushtruar gjatë protestës kanë pësuar lëndime edhe gazetarë. Ajo theksoi se protestat janë një e drejtë kushtetuese, por duhet të zhvillohen në mënyrë paqësore dhe në respekt të ligjit.
“Ligjet, institucionet dhe njerëzit që zbatojnë ligjin duhet të respektohen”, u shpreh Koçiu.
Aktualisht, 16 efektivë po marrin trajtim mjekësor në dy strukturat spitalore kryesore, disa prej të cilëve kanë pësuar djegie të konsiderueshme, ndërsa autoritetet presin referime të tjera.
“Uroj shërim të shpejtë”, përfundoi ministrja e Brendshme.