Zëvendëskryeministrja Albana Koçiu ka vizituar ambientet e reja të spitalit të Peqinit, i cili po transformohet në një Qendër Ekselence Terapeutike dhe Rehabilituese për fëmijët me aftësi të veçanta nga 0 deri në 18 vjeç.
Investimi është financuar nga Qeveria Shqiptare dhe Fondi Shqiptar i Zhvillimit, me synimin për të ofruar shërbime të specializuara dhe rehabilituese pranë vendbanimit të fëmijëve që kanë nevojë për trajtim.
Gjatë inspektimit, Koçiu u shpreh se fëmijët me nevoja të veçanta, të cilët deri më sot janë detyruar të udhëtojnë larg për të marrë shërbimet e nevojshme, do të kenë tashmë në dispozicion një qendër moderne me standarde europiane dhe staf multidisiplinar.
“Paralelisht me këtë investim, po dyfishojmë pagesën mujore për rreth 11 mijë fëmijë me nevoja të veçanta dhe, për herë të parë, 14 mijë kujdestarëve, prindërve dhe familjarëve që janë përkushtuar kujdesit të tyre të përditshëm do t’u njihen sigurimet shoqërore dhe shëndetësore”, deklaroi Koçiu.
Sipas saj, këto masa janë pjesë e Aktit Normativ për buxhetin e vitit 2026, të miratuar nga Këshilli i Ministrave, i cili synon rritjen e mbështetjes sociale, investimeve dhe zhvillimit për qytetarët.