Një person i afërt i familjes së Ervis Martinajt, “mbretit” të lojërave të fatit, është paraqitur në SPAK dhe ka dorëzuar disa kode të aplikacionit “Sky”, që janë përdorur nga ky i fundit para se të zhdukej.
Për këtë çështje ka reaguar pak më parë eksperti i kriminalistikës, Ervin Karamuço.
Ai paralajmëron se çkodimi i bisedave mund të zbulojnë listë-pagesën e tij me policë dhe politikanë.
Karamuço thekson në rrjetet sociale, se për këtë arsye kodet duhet të hetohen me seriozitet nga organet e drejtësisë.
“Aplikacioni Sky ECC është mbyllur në Mars 2021. Zhdukja e Vis Martinit ka ndodhur në Gusht 2022. Mendoj se çdo kod sekret i dhënë nga familjarët, ka pas gjasë të zbulojë fatin e tij. Ato kode nëse do të hetohen me seriozitet, do të zbulojnë listë-pagesën e tij me policë dhe politikanë”, shkruan eksperti i kriminalistikës.