Deputetja socialiste, Mimi Kodheli ka folur për situatën në të cilën ndodhet vendi dhe vendimet e opozitës për djegien e mandateve dhe vijimin e protestave.
Në një intervistë në emisionin “A show”, ajo tha se opozita e ka humbur busullën, ndërsa maxhoranca ka problemet e veta.
“Busulla është e rëndësishme në jetë sepse të përcakton disa ekuilibra që duhet t’i kesh, pavarësisht tundimeve, pavarësisht erërave. Nuk e di nëse busulla quhet shikim por busullën e ka humbur opozita.
Mazhoranca mund të ketë problemet e veta, nuk dua të fshihem pas gishtit. Problemet e mazhorancës dhe opozitës shqiptare janë problemet e shoqërisë shqiptare. Ne merremi dhe me hallet e opozitës sepse merremi me hallet e gjithë Shqipërisë”, tha Kodheli.
Për sa i përket qëndrimeve kritike, Kodheli tha se nuk janë domosdoshmërisht kundër.
“Të jesh kritik nuk do të thotë të jesh kundër. Do të thotë t’i shikosh në ndonjë këndvështrim ndryshe por jo domosdoshmërisht të jesh kundër”, tha ajo.