Deputeti i pavarur, Enkelejd Alibeaj tregon pse e quan një pazar Kodin e ri Zgjedhor mes PD-PS, ku thotë se Sali Berisha i jep kështu mandatin e katërt qeverisë, kryeministrit Edi Rama.
”Nuk ka ndodhur vetëm ditën e djeshme. U bë 8, 9 muaj, një pazar mes Berishës dhe Ramës. Për ti dhuruar Ramës mandatin e katërt në tavolinë pa zgjedhje. 3 ishin kërkesat që depozitova 3 muaj më parë. Shqipëria një zonë, vota e diasporës efektive dhe listat e hapura. Ndaj ajo se çfarë ndodhi dje, u la në fuqi ndarja e Shqipërisë në 12 zona. 12 mandate PS e Ramës i merr qyl. Përdor buxhetin, përdor patronazhistë, gjithçka. Merr dhe 12 mandate”,-tha Alibeaj për ”Report TV”.
Nga ana tjetër, Alibeaj u shpreh se propozimi për 1/3 e listës dhe lënien e sistemit po kështu si në 2008 erdhi nga Bylykbashi, pra nga Sali Berisha. Sipas Alibeajt, me këtë marrëveshje parlamenti i ardhshëm do kthehet në ushtri kukullash të dy kryetarëve.
”Kanë bërë një sistem, 1/3 është e fiksuar. Ata që vendosen këtu nuk i nënshtrohen votës parapëlqyese. Mund të bëhen deputetë edhe me 0 vota. 47 deri 48 mandate bëhen deputetë vetëm se i cakton kryetari i partisë. Ngelen vetëm 44 që zgjidhen nga zgjedhësit. Parlamenti i ardhshëm do jetë jo me 140 deputetët, por vetëm me 2, kryetarët e partive.
Pjesa tjetër një ushtri kukullash. E kanë kthyer në sistemin e listave të mbyllura të 2008. Ajo që u miratua mbrëmë bie ndesh me Kushtetutën. Të paktën thuhet në Kushtetutë listat janë të hapura. Nëse dikush mbyll listat, le ta bëjë partia, por jo të detyrojë shqiptarët të bëjë një zgjedhje të caktuar”.