Mbi 50 vite në skenat shqiptare të muzikës. Disa libra të shkruar dekadat e fundit. Rapsodi dhe publicist Shefqet Merra është i njohur jo vetëm në trevën e Matit, por edhe përtej kufijëve të Shqipërisë.
“E kam nisur karrierën që në moshën 11 vjeçare, thotë Merra. Kam mbi 500 tekste këngësh të ndryshme gjatë karrierës”, shton ai.
Është lindur në fshatin Urxallë, në vitin 1956. Ka mbëruar shkollën e muzikës në vitin 1974 në Shkodër dhe është diplomuar vite më vonë për gjuhë-letërsi.
Është autor i këngëve të njohura: “Lulja e malit”, “Moj e mira cucë matjane”, “Për flamur kemi ba betimin”, “Moj ushtria popullore”, etj.
Në festivalet e fëmijëve, të organizuara në Shkodër është duatrokitur me këngët: “Bariu dhe baresha”, “Bilbilat e pranverës”, “I duam veglat popullore”, “Mësuesja jonë e dashur”.
Merra është autor i disa librave me poezi. Njihet si një poet që e “qëndis” fjalën e urtë popullore dhe është thumbues me fenomenet negative të kohës.
“Fjalë të urta bishtqëndisura”, “Njerëzori”, “Huri i Nastradinit”, “Koha e leshit”, “Poezi të rralla”, “100 gjëagjëza popullore”, janë disa prej librave që kanë për autor Shefqet Merrën.
Ai shprehet se në konkurset e organizuara nga Radio Tirana është shpallur fitues për humorin brilant, duke u vlerësuar për krijimtarinë e pasur dhe të bukur.
Ai është shumë aktiv në rrjetet sociale dhe së fundi po kontribuon për një koncert të fëmijëve matjanë me rastin e 100 vjetorit të bashkisë së Matit.