Tre proceset e fundit parlamentare, që nga ai i vitit 2017, kanë treguar se aksioni i PD-së mbetet i njëjtë, komision hetimor për të bërë politikë me humbjen. 4 vite nga dështimi i komisionit që u bë në vitin 2021, Sali Berisha duket se po ecën në të njëjtën rrugë me Lulzim Bashën.
Objektivi është i qartë, hetim të parlamentareve të 11 majit me pretendimin se nuk kishte zgjedhje, por farsë. Anëtari i komisionit hetimor të zgjedhjeve të 25 prillit, Ferdinand Xhaferaj heq një paralele mes kryetarit dhe ish kryetarit të partisë.
”Po, dëshmojnë se po ecin me gjurmët e Lulzim Bashës, sepse në 2021 ai ngriti një Komision Hetimor që çuditërisht u mbyll pa dhënë asnjë argument. Por nëse i kthehemi çështjes ne themel, kur zoti Berisha u kthye me foltoren dy ishin akuzat që ai i bëri Lulzim Bashës për zgjedhjet. Ai përcaktoi qartë se Basha ose ishte i pazoti ose kishte shitur zgjedhjet. Në 2025 Berisha mori një rezultat me të keq se Lulzim Basha, kjo dëshmon që ka qenë me i pazot se Lulzim Basha apo i ka shitur shume me tepër se Lulzim Basha?”, tha Xhaferaj.