Kongresmeni amerikan Ritchie Torres, një zë i fortë pro anëtarësimit të Kosovës në NATO dhe BE, u ka dërguar një letër ambasadorëve pesë vendeve të Bashkimit Evropian që ta njohin Kosovën si shtet i pavarur.
Torres u shkroi ambasadorëve të Qipros, Greqisë, Rumanisë, Sllovakisë dhe Spanjës që të ndryshojnë qasje ndaj Kosovës dhe ta njohin si shtet të pavarur.
“Kosova ka qenë e pavarur për 14 vjet, por ka disa vende të BE-së që nuk e njohin këtë. Unë i bëj thirrje Qipros, Greqisë, Rumanisë, Sllovakisë dhe Spanjës që të rishqyrtojnë pozicionin e tyre dhe ta njohin Kosovën si një komb të pavarur në mënyrë që Kosova të ketë një rrugë për të hyrë në BE”, ka shkruar Torres, në një postim në Twitter.
Kujtojmë se disa ditë më parë kongresmeni amerikan nisi një fushatë për anëtarësimin e Kosovës në NATO, nisur dhe nga zhvillimet në Ukrainë.
“Në sfondin e pushtimit ushtarak të Rusisë në Ukrainë, Kosova sërish kërkon të jetë anëtare e NATO-s. Disa javë më parë, unë avokova për pranimin e Kosovës në NATO. Bërja e gjësë së duhur nga aleatët tanë nuk ka qenë kurrë më urgjente”, tha ai.