Rektorati i Universitetit të Tiranës është mbledhur këtë të premte dhe ka vendosur t’u bëjë thirrje studentëve të rikthehen në auditore për të nisur procesin mësimor, duke iu garantuar edhe të drejtën e tyre për të protestuar. Gjithashtu, rektorati njofton edhe shtyrjen e afatit për shlyerjen e tarifës së studimeve.
Rektorati i Universitetit të Tiranës i bën thirrje studentëve që t’i rikthehen procesit mësimor në fakultete pas protestës e cila vijon prej ditëve të para të dhjetorit 2018. Ka qenë një mbledhje e Rektoratit këtë të premte që ka vendosur nisjen e procesit mësimor. Vendimi për rinisjen e mësimit në fakultete mban firmën e rektorit Mynyr Koni.
Rektorati i UT kërkon nga studentët të ulen në auditore duke iu garantuar edhe të drejtën e protestës, ndërsa njofton shtyrjen e afatit për shlyerjen e tarifës së studimeve. Sa i takon tarifës së studimeve, qeveria ka vendosur ta paguajë atë vetë 100% për studentët ekselentë dhe ata në nevojë, ndërsa pjesa tjetër e studentëve do paguajë vetëm 50% të asaj që kanë paguar deri tani.
Gjithashtu, Rektorati njofton edhe zëvendësimin e orëve mësimore të humbura për shkak të protestës ndonëse për këtë pjesë nuk ka një sqarim të detajuar nga Rektorati i UT.